Qaar ka mid ah xildhibaanada baarlamaanka Soomaaliya ayaa shalay galab ka hadlay go’aankii shir guddoonka golaha baarlamaanka Soomaaliya ee ku aaddanaa xal u helidda mooshinnadii iska soo horjeeday.
Xildhibaannada, ayaa sheegay inay aqbaleen soo jeedintii guddoomiye Jawaari ee ahayd in wada-hadal lagu xalliyo arrinta mooshinka ka dhanka ah madaxweynaha, sidaas darteedna ay dib uga laabteen mooshinka.
Waxa ay xildhibaannadan sheegeen in aragtidan ay sidoo kale la qabaan dhammaan 93-kii xildhibaan ee horey u gudbiyey madaxweynaha Soomaaliya Xasan Sheekh, inkasta oo aan taas la xaqiijin karin.
Xildhibaannadan, ayaa si kastaba sheegay inay mooshinka ay la noqonayaan kaliya inta wada-hadalka fursad laga siinayo, haddii wada-hadallada ay ay guuleysan waayaanna ay sii wadi doonaan.
Weriyaha VOA Jacfar Kuukaay ayaa warbixintan Muqdisho ka soo diray.
