Kuuriyada Waqooyi 'oo 1,500 askari u dirtay' Ruushka

Kuuriyada Waqooyi ayaa 1,500 oo askari oo dheeraad ah u dirtay Ruushka, sida ay hay’adda sirdoonka Seoul u sheegtay sharci-yaqaannada Arbacadii, iyadoo 10,000 oo askari la filayo in la geeyo bisha December.

Daad-gureyntii ugu dambeysay ayaa ka dhigaysa tirada ciidamada Pyongyang ee Ruushka 3,000, ayuu yiri xildhibaan Park Sun-won, ka dib warbixin kooban oo ay bixisay Hay’adda Sirdoonka Qaranka.

"1,500 oo askari oo dheeraad ah ayaa la rumeysan yahay in loo daabulay Ruushka... marka ku dhawaad 3,000 oo askari oo Kuuriyada Waqooyi ah ayaa la rumeysan yahay in la geeyay Ruushka illaa hadda," Park, oo ka tirsan guddiga sirdoonka ee baarlamaanka, ayaa u sheegay weriyayaasha.

"Ku dhawaad 10,000 oo askari oo ka socda Kuuriyada Waqooyi oo la qorsheeyey in la geeyo Ruushka ayaa la filayaa in la dhameystiro December," ayuu raaciyay.

Hay’adda Sirdoonka Seoul ayaa todobaadkii hore sheegtay in Pyongyang ay go’aansatay in ay “ciidamo baaxad leh” u dirto Ruushka si ay ula dagaallamaan Ukraine, taasi oo xoojinaysa isbahaysiga milatari ee muranka badan dhaliyay ee ee Pyongyang ay la leedahay Moscow.

Warbaahinta dowladda Kuuriyada Waqooyi ayaan ka hadlin ciidamada la sheegay in la diray, taasi oo Ruushku uusan sidoo kale xaqiijin.

Kuuriyada Koonfureed ayaa muddo sheegeysay in Kuuriyada Waqooyi oo ku hubaysan hubka Nukliyeerka ah ay Ruushka siiso hub ay u adeegsadaan Ukraine, waxaana Seoul ay walaac ka muujisay ciidamada la dirayo, taasi oo imaanaysa ka dib markii Kim Jong Un iyo Madaxweynaha Ruushka Vladimir Putin ay saxiixeen heshiis militari bishii June.

Jarmalka ayaa Arbacada maanta ah sheegay inay u yeereen ergayga Kuuriyada Waqooyi sababo la xiriira taageerada Pyongyang ay siiso Ruushka ee dagaalka Ukraine, waxayna uga digtay dowladda go’doonka ah inay ciidamo diraan.

Maraykanka iyo NATO ayaan wali xaqiijin daad-gureynta, balse warbaahinta Ukraine ayaa sheegtay in madaxweyne Volodymyr Zelensky uu sheegay Talaadadii in laba guuto oo Kuuriyada Waqooyi ka tirsan -- oo midkiiba 6,000 oo askari ah -- ay tababar ku qaadanayeen Ruushka.

Sidoo kale Talaadadii, kanaalka Telegram-ka Ruushka ee Astra ayaa sii daayay muuqaallo la sheegay in ay muujinayaan askarta Ruushka iyo Kuuriyada Waqooyi, iyadoo cod ku jira laga maqlayo weedho ay ka mid yihiin "waan daalanahay" iyo "waan soo daahnay" oo lagu leeyahay lahjadda Kuuriyada Waqooyi.