Maamulka Puntland ayaa maanta ku amray warbaahinta madaxa banaan ee ka howlgasha Puntland inaysan tabin wararka ku saabsan kooxda mucaaradka ku ah maamulkaasi.
Amarkaasi waxaa si weyn u canbaareeyay ururada warbaahinta kala duwan, gaar ahaan kuwa Puntland. Xoghayaha guud ee ururka Saxafiyiinta Puntland Burhaan Axmed Daahir ayaa isagoo ku sugan magaalada Gaalkacyo VOA-da u sheegay inaysan u hoggaansami doonin amarkaasi, wuxuuna sheegay in amarkaasi uu ka hor-imanayo dastuurka u yaala maamulka Puntland oo qoraya in warbaahintu ay xor u yihiin una madax banaan yihiin howsha shaqadooda iyo tabinta wararka kala duwan.
