Maamulka madaxweyne Joe Biden ayaa toddobaadkan ku dhawaaqay in Maraykanku uu Ukraine siin doono baabuurta dagaalka ee Bradley, si loogu isticmaalo dagaalka ka dhanka ah duullaanka Ruushka, tallaabadaas oo ay khubaradu sheegeen in ay wax weyn ka tari doonto.
Bradley waa hub oo xoog badan oo awood u leh in uu burburiyo taangiyada cadowga. Waxa kale oo loo isticmaali karaa in lagula socdo goobaha dagaalka iyo in si degdeg ah loo dhaqaajiyo tiro yar oo ka mid ah ciidamada lugta, iyagoo bedqaba.
Hubkan Bradleys ayaa wuxuu qeyb ka yahay xirmo gargaar oo weyn oo dhan $2.85 bilyan oo Mareykanku uu u ballan qaaday Ukraine.
Ku dhawaaqista ayaa soo baxday isla-maalinta hoggaamiyaha Jarmalka Olaf Scholz uu sheegay in dalkiisu uu siin doono gaadiidka dagaalka ee Marder, oo la mid ah Bradleys, iyo nidaamka difaaca hawada ee Patriot.
Maalin kahorna, Faransiiska ayaa ku dhawaaqay inuu bixin doono baabuurta gaashaaman ee dagaalka ee AMX-10 RC.
Tallaabooyinkan ayaa muujinaya kordhinta taageerada Ukraine ee Maraykanka iyo xulafadiisa, kuwaas oo ka warwareegayay inay u diraan hubka casriga ah sida Bradley iyaga oo ka baqayay in Ruushku kasii caroodo.