Golaha Wakiilada Maamul Goboleedka Puntland ayaa meel-mariyey isbeddel lagu sameeyo dastuurka maamulkaas, sida lagu sheegay war-saxaafadeed kasoo baxay golaha.
“Xildhibaanada Golaha Wakiillada Dawladda Puntland ayaa waxay cod aqlabiyad leh ku meelmariyeen ansixinta wax-ka-bedelka dastuurka Dawladda Puntland,” ayaa lagu yiri war-saxaafadeed uu soo saaray baarlamanka.
Kulanka ayaa waxaa fadhiyey 60 xildhibaan, waxaana go’aankan oggol ugu codeeyay 54 mudane, halka 6 ay diideen mana jirin cid ka aamustay, ayuu war-saxaafadeedka intaas ku daray.
Wax ka beddelka dastuurka, gaar ahaan qodobada quseeya arrimaha doorashooyinka, ayaa sabab u ahaa xiisad muddo ka taagneyd magaalada Garoowe ee caasimadda Puntland, oo dhowr mar horseedday gacan ka hadal.
Siyaasiyiinta mucaaradka ayaa kasoo horjeeda in wax laga beddelo dastuurka, ayaga oo u arka isku day xukuumadda ay ku sameysaneyso muddo kororsi, eedahaas oo xukuumadda ay beenisay.
Faah-faahinta warkan waxaa soo diray Nuux Muuse Birjeeb.
Your browser doesn’t support HTML5
Baarlamanka Puntland oo ansixiyey wax ka beddelka dastuurka