Kooxda Jarmalka ee Bayern Munich ayaa xaqiijisay booskooda wareegga siddeedda ee koobka kooxaha horyaallada Yurub ee Champions League, kadib markii ay xalay 2-0 ku dhifteen kooxda PSG ee wadata xiddigaha Lionel Messi iyo Kylian Mbappe.
Weeraryahanka Bayern Munich Eric-Maxim Choupo-Moting ayaa gool ka dhaliyey kooxdiisii hore ee PSG, halka gool kale dhammaadkii ciyaarta uu dhaliyay Serge Gnabry, waxaana halkaas kusoo dhammaaday rajadii kooxda Faransiiska.
Tababaraha Munich Julian Nagelsmann ayaa sheegay in isaga iyo ciyaartooydiis ay ku faraxsan yihiin inay u soo gudbaan wareegga xiga ee Champions League.
Dhinaca kalena, kooxda toddobada jeer ku guulaysatay koobkan ee AC Milan ayaa markii ugu horaysay muddo 11 sano ah soo gaartay wareegga siddeedda kadib markii ay ciyaar ay xalay ay kaga hortimid Tottenham ay kusoo idlaatay 0-0.
Lugtii hore ayay AC Milan kusoo badisay hal iyo eber, taas oo celcelis ahaan 1-0 ugu soo baxday wareegga xiga.
Isku aadka wareegga siddeeda ayaa dhici doona 17-ka March.