Madaxweynaha Turkiga Recep Tayyib Erdogan ayaa Talaadadii sheegay in loo baahan yahay maamul loo dhan yahay oo ka hirgala dalka Suuriya kadib markii xilka laga tuuray madaxweyne Bashaar Al-Asad.
Erdogan ayaa ugu baaqay Midowga Yurub in ay taageeraan dib u soo celinta dadka Suuriyaanka ah ee ka qaxay dagaalada sokeeye ee dalkaas ka socda 13-kii sano ee la soo dhaafay. Hadalkan ayuu ka sheegey shir jaraa’id oo ay wada qabteen isaga iyo guddoomiyaha guddiga Midowga Yurub Ursula von der Leyen oo ku sugan magaalada Ankara.
Dowladaha reer galbeedka ayaa si tartiib tartiib ah u furaya wadiiqada maamulka cusub ee Dimishiq ee ay hogaaminayaan kooxda Islaamiga ah ee Hayat Tahrir al-Sham (HTS), inkastoo ay sii wadaan inay u aqoonsadaan koox argagixiso ah.
Erdogan ayaa sheegay in gobolka aysan ka jirin meel ay ku sugan yihiin waxa uu ugu yeeray ururada argagaxisada, isagoo si gaar ah ula jeeday kooxda Daacish iyo kooxaha Kurdiyiinta.
Wasiirka arrimaha dibadda ee Turkiga Hakan Fidan ayaa horay u muujiyay muhiimadda ay leedahay geedi-socod isbedel oo loo dhan yahay oo ka dhaca dalka Suuriya.
"Aad ayaan ugu faraxsanahay inaan maanta ku dhawaaqo in 1 bilyan oo Euro oo dheeri ah sanadkan 2024 lagu biirin doono kaalmada qaxootiha Suuriyaanka ah iyo sidii looga gargaari lahaa arrimaha caafimaadka, waxbarashada qaxootiga jooga Turkiga ee reer Syria," ayry tiri Von der Leyen.
Erdogan ayaa sidoo kale ugu baaqay Midowga Yurub in ay taageeraan sidii ay dib ugu laaban lahaayeen dadka Suuriyaanka ah ee ka soo qaxay dagaalka, kuwaas oo malaayiin ka mid ah ay tageen Turkiga.
Von der Leyen ayaa sheegay in Midowga Yurub uu sii wadi doono taageerada Suuriya isagoo diiradda saaraya dib u dhiska iyo in wadahadalka cunaqabateynta looga qaadayo Dimishiq uu billaaban karo marka "horumar dhab ah laga gaaro kala-guur nabadeed," lagu arko dhulka.
Waxa ay intaas uu ku darey in 1 bilyan oo Euro oo dheeraad ah la siin doono si loogu taageero soo noqoshada iskood ah ee Suuriyaanka, iyo in Turkiga laga caawiyo maamulka xuduudaha iyo socdaalka.
Ankara —