Nin lagu tuhmayo in uu gaari ku jiiray dad isugu soo baxay suuqa Christmas oo ku yaalla Jarmalka, halkaasi ay ku dhinteen shan qof, laguna dhaawacay tobaneeyo kale, ayaa wajahaya eedeymo badan oo ah dil iyo isku day dil, sida ay booliisku sheegeen Axadda maanta ah.
Weerarkii fiidnimada Jimcaha ka dhacay bartamaha magaalada Magdeburg ayaa argagax geliyay dalkaas, waxaana uu dhaliyay xiisad la xiriirta arrinta muhaajiriinta.
Eedeysanaha oo xabsiga ku jira ayaa ah 50-jir ku takhasusay dhimirka oo u dhashay dalka Sacuudiga, islamarkaana horey loogu bartay hadallo Islaam nacayb ah, wuxuuna ku noolaa dalka Jarmalka ku dhawaad labaatan sano. Sababta weerarka ka dambeysay ayaan weli caddeyn.
Mudaaharaad ay abaabuleen kooxah midigta fog ah, oo ay ka soo qayb galeen ilaa 2,100 qof, ayaa habeenkii Sabtida ka dhacay Magdeburg, sida ay booliisku sheegeen.
Dibad-baxayaasha ayaa qaarkood sitay boorar ay ku qoran yihiin “dib u tahriibin” oo ah eray ay caan ku yihiin taageerayaasha midigta fog oo doonaya tarxiilin baaxad leh oo lagu sameeyo dadka aan jin ahaan aheyn Jarmal.
Dadka kale ayaa isugu soo baxay si ay ugu baroor-diiqaan dadkii dhintay.
Garsoore maxkamad ayaa amray in tuhmanaha, oo warbaahinta Jarmalka magaciisa ay ku sheegeen Taleb A., xabsiga lagu sii hayo, isagoo lagu eedeeyay shan dambi oo dil ah iyo sidoo kale dambiyo badan oo isku day dil ah iyo dhaawacis halis ah, sida ay booliisku sheegeen.
Si deg deg ah looma xaqiijin karo haddii tuhmanaha uu leeyahay qareen matala.
Dadka la dilay ayaa kala ahaa wiil sagaal jir ah iyo afar dumar ah, oo da’doodu kala tahay 52, 45, 75 iyo 67, ayaa lagu yiri bayaanka booliska. Dadka dhaawaca ah, ku dhawaad 40 ayaa qaba dhaawacyo halis ah.
Magdeburg —